فزكان من شعب نائم
لم استغرب يا اخوان وداعتكم حينما قرأت في وكالتنه العزيزة خبرين الأول: تأجيل التصويت على تخفيض رواتب المسؤولين، والثاني يبعد رويحتي هو تأجيل التصويت على مرشحي الوزارات الأمنية إلى نهاية حزيران القادم. فالخبرين لا يحملان أية غرابة، وما أنا مستغرب له بصراحة هو ليش خلو التأجيل لنهاية حزيران يعني لو مخليه لنهاية السنة أو لنهاية السنة البرلمانية والله أحسن، لأن السيد رئيس الوزراء بعد عيني طلع على شاشة قناة العراق الأوحد (على عناد كل الحاقدين على حزب الحكومة) العراقية وقال: ليش شبيهن الوزارات الأمنية شو أني دايرهن كلهن على حسب الأصول وما صارت أي مشكلة. بعد شنو الحاجة لتعيين وزراء امنيين؟ وليش احنه عدنه مشكلة أمن أصلاً؟ شو الحمد لله العراق دولة مستقرة مثل ما قال رئيس وزراءنا المحبوب (فلفل بعيون الأعداء).
المالكي قبل انقضاء الميت يوم
ولا عدنه مشكلة أصلاً، والحمد لله البعثيين صاروا حبايب ودخلناهم بالمصالحة لكل أجهزة الدولة الأمنية والإدارية، وإن كان الحق مثل ما قال الدكتور الجعفري إن المصالحة تحتاج إلى أن تطبق في الواقع ولا تبقه بالتنظير (عميت عين اللي ما يشوف عدل) بوية بعدهي المصالحة تنظير ما مطبقة لأن فيلسوف الموزائيك العراقي المنبعج في التمحورات البلورية المرتكزة على الترتبات الفحولية في المجتمع الناهض المتأثر في الإنعكاس الديماغوجي للفكر الفيسيوكاربوني والمتعاكس مع الطبقات التاكتونية في الأعماق التضاريسية الفائقة القدرة في المثلت الإرتكازي للهالة المتجسّرة في الانطعاج المتقهقر في البنية البنيوية... (مع الاعتذار لهشام حيدر ومحسن الجابري)(1) إلخ بوية والله انكطع الخيط... هذا الفيلسوف العظيم هو اللي يكول خو مو آني جاي اكول.. الخلاصة اخواني أني برأيي كفزكان من هذا الشعب إن حزيران ستهطل به الأمطار الحكومية الرائعة ودعوني أصف لكم المشهد في حزيران وشوفوا بعينكم (وعميت عينه اللي ما يشوف) شلون ما الأمطار راح تمطر في حزيران بغزارة.
1: شو بحزيران راح تنتهي وعود الحكومة بالميت يوم وما يصير يوم زايد وراح تشوفون شلون المشاكل كلهه انحلت، والفساد انتهه والكهرباء يا عيني على الكهرباء راح تجيكم لووووووووووز يعني الماعنده مكيف خلي يروح يشتري مهفة (العفو قصدي كنتور مسبلت) واعتقد إن وزارة الكهرباء بثلاثيتها الرائعة (رعد شلال التكفيري السابق + رعد الحارس النزيه جدا جدا جدا + سلام القزاز العفيف جداً وايفري وير وأني تايم) وتطلع النتيجة: وات أيفر؟
كهرباء شلة الأنس المجاهد صاحب السعفة الذهبية وجماعته (شلال والحارس والقزاز)
راح يجزعوكم بالكهرباء بالشكل اللي راح يعتذرون للشعب العظيم عن الأخطاء الطفيفة التي حصلت في فصل الربيع لأن السبب يكمن في إن الحكومة لم تنتبه إلى إن الشعب سيقصّر جداً في استهلاك الكهرباء في الربيع ولا يستفيد من العطاء الربيعي. أصلا الكهرباء بحزيران وتموز بصراحة راح تكون ديمة وسايحة على كووولة عربانه، ويكولون فوك الكهرباء راح يوزع الدكتور المالكي مهفة أوريجنال خالص(صناعة كورية) وفانوس هيفي ديوتي ولكستك ابو العودة نايس كواليتي، وهناك بشرى خاصة صراحة من الدكتور صلاح عبد الرزاق سيعلنها بالنيابة عنه أحد أرحامه: وهي إن الدعاء الذي ظل يناجي به الدكتور ربه خلال هذه ال 100 يوم من أجل أن لا يأتي الحر في حزيران وتموز قد تم استجابته، وفعلا راح تكون درجة الحرارة المتوقعة دون المعدل (يعني تقريباً 49 إلى 49 ونص) مع توصية من الأخ كامل الزيادي وحسين الشهرستاني بأن لا يوكف أحد تحت الشمس خاف تصير بيه بلهارسيا!!
عملا بنصائح الشهرستاني والدباغ نقدم الصورة التوضيحية للتخلص من مشكلة الكهرباء بالنهار
والبطاقة التموينية خو حدث ولا حرج، والفساد يا عيني على الفساد يكولون إن موظفي الحكومة الكبار راح يدفعون من رواتبهم للمواطنين اللي يراجعونهم حتى يمشون معاملاتهم (قبل ما ينلعن والديهم)، لأن المواطن الفزكان خطية يراجع الدائرة وتعبان بهالصيف وعطشان ويصرف من جيبه لذلك رأفة بهم سينفق هؤلاء على المواطنين (ليش مو هالمواطنين همه كعدوهم في هذي المناصب فليش تنقققققون يا حاقدين) أصلاً شعنده المواطن يراجع الدوائر، هي الدوائر راح تجي للمواطن، وكل مدير دائرة شايل طاسة ويصيح: لله يا محسنين منو عنده معاملة اكضيهه إله جا مو همه يكولون قرينه نهج البلاغة؟ .. البقية انتوا كملهوهن خو مو تريدون كلهن اني احجيهن.
2: الحمد لله راح تكون العلاقات بين الكتل السياسية دهن ودبس ووياهن كيمر بعد باعتبار إن الاتفاقية الأمنية ويه أمريكا راح يحين موعدهه وأبداً ماكو مشكلة لا بين دولة القانون وبين التيار الصدري، ولا بين العراقية ودولة القانون خو اخونه كاكا حمه كاعد يتفرج وما يهمه منين ما تجي.. المقسوم يوصل والحمد لله، طبعا هذاك الوقت راح تشوفون الزواج الصدري مع دولة القانون راح يصير كاثوليكي وكل واحد يتحدث عن الطلاق إنما هو حاسدددد بالثلاثة، وأمريكا راح تكعد راحة وعاقلة كل هالفترة.. لا ارهاب ولا تفجيرات ولا يتفاقم شأن المكاومة لكن اتوقع يومية تطلع بيان تستنكر بيه العمليات الارهابية اللتي تنفذها جماعات القاعدة!! اللي دفعة وحده تنام ودفعة وحده تكعد.
3: طبعا بهذاك الوقت راح ينزل الوحي والرحمة على الثنائي المرح (الأخ المالكي والرفيق علاوي) وراحوا يتفقون بيناتهم فالمالكي راح يتنازل عن رغبته الأساسية في أن يجيب واحد للداخلية والدفاع والأمن الوطني يستطيع ان يكون عزت الدوري مال زمانه كلشي عنده ينتهي بحاضر سيدي، وراح يقسم أيمان مغلظة بأنه سوف يطبق القانون على الجميع خصوصاً بعد ما شلع اخونه المسؤول الأمني أبو علي البصري لأستراليا وأخذ معه الجمل بما حمل وعلاوي راح يبطل مناكفته السياسية لأجل المناكفة وراح يثبت للعالم جميعا إنه لا يعارض حتى يقال إنه موجود، وراح يتصافون ويكعدون أمام الشعب ويكولون يابه احنه اتفقنه، والأهم كل واحد راح يقره النشيد المعروف والمحبب لقلوب المواطنين: الوحدة الوطنية وحكومة الشعب وحرية المواطن وسعادته ورفاهه.. ويكولون والعهدة على الراوي صراحة: إن الإجراءات الأمنية المشددة التي كانت في طريق المطار والمطار لأن كاظم الساهر المناضل القديم قد أقبل في طائرة التاسعة والنصف صباحا، وسبب هذه الإجراءات لأنه هو من سيقرا النشيد، ويكولون بعد هالنمامين إن قناة حزب الحكومة (العراقية) يوم امس الأول ما احتفلت بالمذيع الكبير الذي قرأ بيان 17 تموز نهاد نجيب وكرمته إلا لأنه هو من سيعلن هطول المطر الحكومي في بيان مشهود.
أما الرفيق صالح المطلك فسيعلن في حزيران وعلى مرأى ومسمع من كل رفاق الأمس إنه بريء من حزب البعث، عرفاناً بجميل من أرجعه من كونه مجتثاً بقرارات هيئة الاجتثاث النزيهة جداً إلى تحويله بقدرة قادر إلى نائب رئيس الوزراء..
أما حكاية الرواتب وتنزيلهه لا وهالمرة بهاء الأعرجي زيد المطر زخة من قال إن كتلة التيار تطالب اعدت مقترحاً لإلغاء تقاعد البرلمانيين فهي حالوب خاص بيوم 35 شباط القادم (مو مهم يا شباط منهن المهم بيوم الخمسة وثلاثين بالشهر)، وعتبوني لو راح ينزلون فلس واحد.. اتذكر فد مرة كاعد على التلفزيون واباوع مثل الصدك على جلسة البرلمان أول العام يعني باواخر عمر البرلمان السابق وكام النائب السابق: احمد المسعودي وصاح وناح على المواطنين وحقوقهم وطالب بان تخصص الحكومة مبلغ 100 ألف دينار لكل عراقي عيدية، فرفع أخو هدلة حسن السنيد مهندس المهندسين فعاتب أحمد المسعودي أن ال100 ألف لا تكفي المواطنين وعلى الحكومة أن تقدم لكل واحد 500 ألف.. أحد الموطفين في البرلمان قال لحسن السنيد هاي انتو جديين؟ فقال له السنيد: خوية نهاية البرلمان كل شي واحد يصير يحجي حتى لو يطالب بأن يصير طنطل ليش هو منو اللي يسمع؟ ومنو اللي يطبق؟
تريدون اكمل؟! لو كافي مطر بوية غركنه؟ تره الكاك مفتوح ها.. وذنب الما يريد على جنبه، ولا تخافون تره الحكومة رتبت حل لمشكلة الغرك هذه والصورة خير شاهد على الجهد الحكومي
هذا الحل مقترح خاص من السيد صالح المطلك وعلي الدباغ بالتنسيق مع حيدر العبادي مسؤول اللجنة المالية في البرلمان وحسن السنيد مسؤول اللجنة الامنية (مع تقبيلي يد أشرف شرطي مرور وابن حمولة)
ههههههههه امي واكفة يمي وتكول بلهجة أهلنه: عوينت ابو اصلك بعدك تصدك الحكومة يمه؟ فقلت لها: جا يا هو الأصدكة؟ البرلمان؟! قالت: يمة كلا الأخوين (...) ولكن... علاء الدين (..) من أخيه.. يالله سيد محسن تعال انت خلي النقاط على الحروف مال هذا البيت .. فنك تسويهه!!
(1) أويلي شلون اثنين واحد من الناصرية وواحد من النجف.
https://telegram.me/buratha
