بعض "الجماعة" يمسلتون!

✍️ إياد الإمارة||   ▪ التمسلت مصطلح عراقي عامي، معناه: الحچي الزايد عن حده، أوالذي لا معنى له، أو لا فائدة منه، أو أنه الكلام غير الواقعي.. واعتقد أن أصل هذا المصطلح مأخوذ من كلمة "يسلت" والسلت كما أعرفه يعني "السحب"، أي أن يسلت بمعنى يسحب، ومنه "يتسيلت" أي يتسحب بطريقة مستهجنة. هسة صاروا بعض الجماعة يتسيلت ويمسلت علينا في نفس الوقت، واحنة ناس فقرة وعلى گد حالنا! بعض السياسيين وما أعرف من يا باب من الأبواب العراقية "المتهرئة" وهم يشعرون أنهم (الزعيم، المهيب، الملهم، المفكر، الوسيم،...الخ) يطلوا علينا من قاعاتهم الفارهة وعبر عروض تلفزيونية لا تزال باهتة و "يمسلتون" علينا:  برؤاهم..  وأفكارهم..  ومبادراتهم.. ومقترحاتهم..   ودعواتهم..  التي لا تعدو كونها حچي زايد بلا معنى وبلا فائدة وغير واقعية..  يعني واقولها مرة أخرى "تمسلت" يذكرني بتمسلت أخو هدلة أبو الحفرة من أكل طن إهانات وهزائم وكفخات وطلع يمسلت ويگول "العزة بخشوم الرجال!“ وطلعلة صلاح عبد الغفور يغنيلة: صدام العزيز گال العزة بخشوم الرجال من كون عزة العزاهم بما فيهم عزة الدوري، ودوري يا دنيانا دوري وأجوا علينا سياسيين يمسلتون نفس التمسلت وبنفس الطريقة. العراقي فوگ قهره وفوگ ضيمه لا خدمات ولا فرص عمل ولا راحة والفساد شالع گلبه ويشوف دولته صايرة بجيب فلان وجوة عمامة علان، الوظائف الچبيرة محصورة ومبين خيطها، والإمتيازات عالگة، والطبقية على أشدها، فوگ كل هذا ويجي واحد يمسلت براسه! والله العراقي أبو صبر.. "صبر العراق صبور انت يا جمل" وهسة أجانا واحد  جديد طلع إلنا من بين كل خيبات بعض أهل السياسة وجهلهم وحرمنتهم، يبلع حروف الكلمة حجيه كله تمسلت، وتعال يا عمي شيل يالعراقي وتحمل، لا تطلع خائن وعميل وكافر.. خوش عمي والف خوش، براحتكم، تسيتلوا ومسلتوا، الديرة ديرتكم.