أحمد لعيبي
طبعا بفترة صدام بطل الحفرة القومي كان عمي الوحيد هاشم شالع كلوبنه ويوميه فالت من الجيش ورايح جدي وابوي ساعة لوحدته العسكرية وساعة للفرقة الحزبية حتى يسدون حلوك الرفاق عنه واللي كال واحد منهم لجدي باخر روحه (هروب ابنك هاشم يهدد السلم الاهلي والمجتمعي ويساهم بتعزيز التوسع الامبريالي والمطامع الاسرائيلية بالعراق )
طبعا جدي رجع سولف لعمي هاشم بس ما كاله هيج وانما كاله (البعثية مثل نعال امك حتى من ينكطع ما تذبه وتشوف شكد مكومة نعل امك بالبيت ..!!خلصنا ورد داوم وتسرح الله يرضى عليك)
طبعا عمي هاشم ما عجبته السالفة ولا النعل ..!!
رجع لوحدته بس على مضض ويوميه متعارك ويه ضابط ورايح ابو لعيبي سادها بالصاية والعكال والشيبة مالته..
اخر شي اجه عمي هاشم بخطة بناء واصلاح لوضعه وكال اني مستقل بقراري وتعبتكم كلش وراح اخليكم ترتاحون وتشوفون وجه الله ...يابه شلون كال لكيت ضابط بعثي مرتشي راح يسرحني بس يريد طلي و٢٥الف ..
الطلي اني دبرته وال ٢٥ الف اريدكم تجمعولي ..
لمينا فليستنا وحطينا كلشي بيده وكلناله منتظرينك نسمع خبر حلو ..!!
شو شهر شهرين ثلاث اشهر وعمي هاشم بس يصرح وكلشي ماكو ..وانوب لو ظال هارب وضامينه احسن من الضيم مالتنه لا نعرف هارب يداوم رتب اموره عبالك كواليس تشكيل حكومة في زمن ما...
فد يوم اجه الضابط لبيتنا يمدح بعمي هاشم وكال (الطلي اللي جابه يخبل وشلون شبعنا بيه شوي اني والجهال )
عمي هاشم بصفي كاعد شاورني (كال تدري الطلي اللي اخذته اله كان ميت ولكيته بالزبالة وصلخته ووديته بعد ما نظفته ..وهذا الطلي هو اللي حل مشكلتي وراح اتسرح)!!!
صفنت واتذكرت عمي هاشم بهالهوسة وكلت بيني وبين نفسي ياربي ماكو طلي ميت مثل طلي عمي هاشم ويحل مشكلة العراق ...!!؟
https://telegram.me/buratha
